गझल

प्रत्येक रात्र येते घेउन याद राणी
गेली किती युगे मी देतोय साद राणी

पेटून थांबलाहे ॐकार स्पर्श माझा
ऐकू तुला न येई हा ब्रम्हनाद राणी

रामायणात सीता भूमीत गुप्त झाली
जाशील तू कुठे गं, भूमीच लुप्त झाली

आता पराभवांची काहीच बोच नाही
पाहून रक्त माझे चंडी प्रतप्त झाली

जातो जिथे जिथे मी नेतो हिच्या मशाली
जिंकून विश्व सारे, बोलेन मायबोली

एकेक अक्षरांच्या वाहुनिया पखाली
घालू सडे सुखाचे, शिंपून मायबोली

छेडला हा सूर कोणी बासरीचा?
स्पंदला का राग माझ्या अंतरीचा?

आज मी गाउ सखे गाणे कशाला
मैफ़लीचा नूर नाही नेहमीचा

हाय, नाही आज या पेल्यात जादू
घेतला हाती घडा तू काकवीचा!

काढुनी यांच्यासवे मी जन्म माझा
चेहरा कोणीच नाही ओळखीचा

पाहुनी तव संपली माझी प्रतीक्षा
आज साथी भेटला जन्मांतरीचा

एवढी झाली आहे आता उधारी
हा न माझा श्वास माझ्या मालकीचा

एक साधे पानही हातात नाही
छाटला त्यांनी असा माझा बगीचा

भलतेच काहि आज मी बोलून गेलो
सर्व काहि सत्य मी सांगून गेलो

तारका ती आजही आलीच नाही
आवसेने मी पुन्हा गांजून गेलो

सत्य हृदयातील या सांगायचे आहे कुठे?
गीत माझ्या अंतरीचे गायचे आहे कुठे?

शोधतो आहे जरी मी मार्ग वेड्यासारखे
हे कधी कळलेच नाही जायचे आहे कुठे?

मी कधी शुध्दीत होतो? नेहमी धुंदीत होतो!
ऐकले नाही कुणाचे माझिया मस्तीत होतो!

दाटतो सार्‍या दिशांना होउनी मी मेघ काळे
मी सदा माझ्याचसठी पावसाची प्रीत होतो

राजवाड्यांची कधी मी कौतुके केलीच नाही
आजही मातीत आहे, नेहमी मातीत होतो

परदेशातून देशामध्ये वारा बनून आलो
क्षितीजावरती चमचमणारा तारा बनून आलो

दाटून आलो डोक्यावरती बनून काळे मेघ
कोसळणार्‍या थेंबांमधल्या गारा बनून आलो

शिल्पकार हा माझा पहिला ऑनलाईन गझल संग्रह. या संग्रहात 2002 ते 2004 च्या दरम्यान लिहिलेल्या आणि प्रामुख्याने मायबोली.कॉम वर प्रकाशित झालेल्या गझला संकलित केल्या आहेत.

पंख आशांचे अता फैलावतो सेन्सेक्स
उंच आभाळी अता झेपावतो सेन्सेक्स

ही सुबत्तेची गुलाबी साखरी स्वप्ने
चाखण्या गोडी अम्हा बोलावतो सेन्सेक्स

भोवताली स्वर्ग अमुचे निर्मितो आम्ही
चित्र स्वर्गाचेच या रेखाटतो सेन्सेक्स

लाख लाखांच्या चुली चेतावतो सेन्सेक्स
लाख लाखांची छते शाकारतो सेन्सेक्स

फूल कोणा लाभते, काटे कुणासाठी
का मिठी कोणा, कुणा फटकारतो सेन्सेक्स?

अन कधी गर्तेत हा झेपावतो तेंव्हा
प्राशुनी कोट्यावधी थंडावतो सेन्सेक्स

ओळखावे तू तरी आता 'प्रसादा' हे
खेळ मायेचाच सारा खेळतो सेन्सेक्स